திருச்சி ஸ்ரீரங்கத்தில் பாரதிய ஜனதா கட்சி சார்பில் மது மற்றும் போதைப்பொருட்களுக்கு எதிரான விழிப்புணர்வு பேரணி நடைபெற்றது. இதில் கட்சியின் முக்கிய நிர்வாகி வேலூர் இப்ராஹிம் சிறப்பு விருந்தினராகக் கலந்து கொண்டு போதைப் பழக்கத்திற்கு எதிராகக் கண்டன முழக்கங்களை எழுப்பினார்.
பேரணி ஸ்ரீரங்கம் ராஜகோபுரம் பகுதியை நோக்கிச் சென்றபோது, அப்பகுதிக்குச் செல்ல காவல்துறையினர் அனுமதி மறுத்தனர்.இதனால் பேரணியில் பங்கேற்ற பா.ஜ.க. நிர்வாகிகளுக்கும் காவல்துறையினருக்கும் இடையே வாக்குவாதம் ஏற்பட்டது.குறிப்பாக, பேரணியில் சிறப்பு விருந்தினராகக் கலந்து கொண்ட வேலூர் இப்ராஹிமுக்கும் போலீசாருக்கும் இடையே சிறிது நேரம் வாக்குவாதம் நடைபெற்றது.இதனால் அப்பகுதியில் பரபரப்பான சூழ்நிலை நிலவியது.இதனைத் தொடர்ந்து ஸ்ரீரங்கம் அம்மா உணவகம் அருகே வேலூர் இப்ராஹிம் போதைப் பழக்கத்திற்கு எதிரான கண்டன உரையை நிகழ்த்தினார்.
மது மற்றும் போதைப்பொருள் பழக்கத்தால் தனிநபர்கள், குடும்பங்கள் மற்றும் இளைஞர்கள் சந்திக்கும் பாதிப்புகள் குறித்து விழிப்புணர்வு ஏற்படுத்த வேண்டியதன் அவசியத்தை அவர் வலியுறுத்தினார்.
இந்தப் பேரணியில் திருச்சி மாநகர் மாவட்ட பா.ஜ.க. நிர்வாகிகள், பல்வேறு அணிகளைச் சேர்ந்த பொறுப்பாளர்கள் மற்றும் தொண்டர்கள் திரளாகக் கலந்து கொண்டனர்.
ராஜகோபுரம் பகுதிக்குச் செல்ல போலீசார் தடை விதித்ததும், அதனைத் தொடர்ந்து வேலூர் இப்ராஹிமுக்கும் காவல்துறையினருக்கும் இடையே ஏற்பட்ட வாக்குவாதமும் ஸ்ரீரங்கத்தில் சிறிது நேரம் பரபரப்பை ஏற்படுத்தியது.
0 Comments