மருத்துவ உலகின் அதிநவீன தொழில்நுட்பப் புரட்சியாக, உலகின் மிக நீண்ட தூர கண்டம் கடந்த தொலைநிலை ரோபோடிக் அறுவை சிகிச்சையை திருச்சியில் உள்ள டாக்டர் ஜி.விஸ்வநாதன் மருத்துவமனை வெற்றிகரமாக நிகழ்த்தி உலக சாதனை படைத்துள்ளது.
பெல்ஜியத்தின் ஜென்ட் பல்கலைக்கழகத்தின் ஆர்சி அகாடமி மற்றும் திருச்சியின் மாம்பழச்சாலையில் உள்ள டாக்டர் ஜி. விஸ்வநாதன் மருத்துவமனை ஆகியவற்றிற்கு இடையே இந்த இரண்டு நேரடி அறுவை சிகிச்சைகளும் நிகழ்த்தப்பட்டன.
பெல்ஜியம் மற்றும் இந்தியா இடையிலான 9,730 கிலோமீட்டர் தூரத்தைக் கடந்து இந்த அறுவை சிகிச்சை தடையின்றி நடந்து முடிந்துள்ளது. சிக்னல் தாமத நேரம் வெறும் 160 முதல் 217 மில்லி விநாடிகள் மட்டுமே இருந்ததால், அறுவை சிகிச்சை மிகத் துல்லியமாக நடைபெற்றது.
லண்டனில் ரோபோடிக் அறுவை சிகிச்சை நிபுணராகப் பணியாற்றி வருக திருச்சியை சேர்ந்த டாக்டர் ரம்யா கலைச்செல்வன், பெல்ஜியத்தில் இருந்தபடி மெட்பாட் டூமாய் ரோபோவைப் பயன்படுத்தி, இந்த இரண்டு அறுவை சிகிச்சைகளையும் தொலைதூரத்தில் இருந்தே வெற்றிகரமாகச் செய்து முடித்துள்ளார்.
திருச்சி மருத்துவமனையில் பேராசிரியர் டாக்டர் கோவிந்தராஜ் மற்றும் டாக்டர் முத்துராமன் ஆகியோர் தலைமையிலான உள்ளூர் மருத்துவக் குழுவினர் நோயாளிகளுக்குத் தேவையான நேரடி ஆதரவை வழங்கினர். மேலும் இந்த அறுவை சிகிச்சை குழுவில் டாக்டர் கிருஷ்ணசாமி கண்ணன், டாக்டர் ஹேமாமாலினி கோவிந்தராஜ், டாக்டர் கருணாகரன், டாக்டர் வெங்கட் பரத், டாக்டர் பால பிரசன்னா, டாக்டர் விஸ்வநாதன், டாக்டர் லட்சுமி பிரியா ஆகியோர் இடம் பெற்றிருந்தனர்.
முதலாவது மகளிரியல் அறுவை சிகிச்சை இந்திய நேரப்படி காலை சுமார் 11.00 மணிக்குத் தொடங்கி, ஒன்றரை மணி நேரத்தில் வெற்றிகரமாக முடிக்கப்பட்டது. இவ்வளவு நீண்ட தூரத்திற்கு இடையே நடைபெற்ற உலகின் முதலாவது கண்டம் கடந்த தொலைநிலை ரோபோடிக் மகப்பேறியல் அறுவை சிகிச்சை இதுவாகும். இரண்டாவது அறுவை சிகிச்சை இடது பக்கக் குடலிறக்கத்திற்கான அறுவை சிகிச்சையும் ஒன்றரை மணி நேரத்திற்குள் வெற்றிகரமாகச் செய்து முடிக்கப்பட்டது.
0 Comments